Created with Sketch. Created with Sketch.

Тележүргізуші Амината Айша Уэдраого: «Бір орында отыра алмайтын адамдарды жақсы көремін»

Амината Айша Уэдраого — журналист, «Еуразия» бірінші арнасында тележүргізуші. Ол Алматыда дүниеге келді, бірақ 3 жастан 12 жасқа дейін Африкада, әкесінің отаны Буркина-Фасода тұрған.

2004 жылы Амината отбасымен бірге Қазақстанға оралды, журналистика факультетін бітірді, ал 2018 жылдан бастап Нұр-Сұлтанда тұрады және жұмыс істейді.

Біз өз өмірін Астанамен байланыстырған жастар туралы көбірек білу үшін MEGA Silk Way-де Аминатамен кездестік.

Телеведущая Амината Айша Уэдраого: «Люблю людей, которые не сидят на месте»

Автор: Тахмина Кибирова
Сурет: Владислав Семенов

Балалық шағы және тәрбиесі туралы

Менің әкем Қазақстанға заңгер мамандығын алу үшін келді. Алматыда ол туған жері Түркістаннан шыққан, дәрігер-акушер мамандығына оқып жатқан қызды кездестірді. Анам әкеммен бір-бірін сүйіп, үйлену тойын жасады. Мені Мұхаммед пайғамбардың анасының атымен — Амината деп атады, менің әкемнің әжесінің есімі сондай болатын. Исламда бұл «адал», «адал жар», «құдай берген» дегенді білдіреді. Екінші есімім — Айша, араб тілінен — «жігерлі, тіршілікке толы» дегенді білдіреді. Мұхаммед пайғамбардың сүйікті жарының есімі болатын.
Буркина-Фасо қаласында біз француз тілінде сөйледік, бұл мемлекеттің ресми тілі. Қазақстандағы сияқты, ол жақта да көптеген туыстарымен бірлесіп үстел басында, үлкен отбасымен жиналғанды, араласқанды жақсы көреді. Алматыға оралғаннан кейін мен жергілікті мектепке бардым. Бірінші уақытта тапсырманың жартысы күнделікте орыс тілінде, ал жартысы француз тілінде жазылған еді. Үш айдың ішінде мен орысша және қазақша сөйлеуді үйрендім. Жарты жылдан кейін мұғалімдер мені басқа балаларға үлгі етті. Қазір мен қазақ, орыс, ағылшын және француз тілдерінде сөйлеймін.
Менің анамның туған-туыстарына Шымкентке немесе апама Түркістанға барғанда қазақша еркін араласамын. Мені «оңтүстік» дәстүрімен тәрбиеледі: мен үйде барлығын өзім жасаймын, тамақ дайындағанды ұнатамын. Менің менталитетім, ойлау тәсілім қазақша, бұл туралы маған шетелдегі достарым жиі айтып жатады. Менің төлқұжатымда «қазақ» деп жазылған, және әрдайым әуежайдың қызметкерлері таңқалып «Сіз шынымен қазақсыз ба?» деп сұрап жатады. Ал кейбіреулері мені қатты күнге күйіп кеткен деп ойлайды, мен олармен дауласпаймын (күлді).

Сыртқы келбеті және пайдалы әдеттері туралы

Мен ем-дәмін ұстамаймын, бірақ өзімді бақылаймын. Мен бешбармақ, қуырдақ жеп, оның үстінен самса мен бауырсақты жеп алуым мүмкін, бірақ келесі күн міндетті түрде жеңіл тамақтанатын күн болады. Спортзалға барамын, бимен айналысамын, бірақ бәрін де өз шегімен жасаймын. Мен жақсы көрінгім келеді, ол тек теледидарда жұмыс жасағаннан ғана емес. Маған өзіммен айналысқан ұнайды. 40 және 50 жасымда да осы тәсілді ұстанамын деп ойлаймын. Әрине, теледидарда жұмыс істей отырып, сіздің келген келбетіңізді сақтау маңызды. Мысалы, егер сізді 54 кг салмақпен жұмысқа алса, бір айдан кейін 64 кг салмақпен жүре алмайсың. Маңызды өзгерістерге жол беруге болмайды, өзіңнің келбетің мен тартымды сымбатыңды сақтаған маңызды.
Мен вегетарианка емеспін, түп-тамырымның қазақ екені байқалады, себебі мен етсіз тамақтана алмаймын (күледі). Бірақ мен тәттілерді жемеймін және ішпеймін, бұл сыртқы келбетіме нашар әсерін тигізеді. Су мен көк шайды көп ішемін. Кейде «Лё то» буркиниялық тағамын дайындаймын, бұл тұздықта дайындалатын тауықтың немесе балықтың еті және қою гарнир. Қазақстанда африкалық ұлттық тағамдарды дайындау үшін көптеген ингредиенттерді таба алмаймын. Эфир алдында төрт сағат тамақ ішуге болмайды. Бұл дауыстың байламдары мен дикцияға қатты әсер етеді. Аздап тамақтануға болады, бірақ қатты тойып тамақтанбау керек. Сондықтан таңғы эфирге ерте келген кезде мен таңғы ас ішпеймін.
Магистратурада мен экологиялық журналистика тақырыбында диссертация қорғадым. Экология мәселесі мені қатты мазалайды: мен қоқысты сұрыптаймын, пластик пен целлофан пакеттерін аз пайдалануға тырысамын, дүкендерге өзімнің сөмкеммен барамын. Бұл менің қосқан шағын үлесім болсын, бірақ әр іс өзімізден, шағын істерден басталады. Әр түрлі кремдер мен басқа «химияларға» қарағанда табиғи заттарды ұнатамын. Марокко майларын өте жақсы көремін: кокос, ошаған майлары және каритэ — Буркина-Фасодағы негізгі майлардың бірі. Кокос майы сияқты, оны тамаққа қолдануға және шаш, тері, тырнақ күтімі құралы ретінде пайдалануға болады. Ол қыста жақсы нәрлендіреді: сіз күні бойы жүрсеңіз де, теріңіз ылғалдандырылған күйінде қалады.

Телеведущая Амината Айша Уэдраого: «Люблю людей, которые не сидят на месте»

Сүйікті кәсібі және тікелей эфир туралы

Бала кезімде мен вокалмен айналысып, Бейонсе сияқты ән айтуды армандадым. Мен бұл арманмен бірнеше жыл қатар өмір сүрдім. Содан кейін сәулетші болғым келді. Нәтижесінде журналист болып, енді караокеде ән айтамын (күледі). Мен қазақстандық режиссерлердің эпизодтық рөлдерінде түстім, егер маған кинода рөл ойнауға ұсыныс түссе, мен ол ұсынысты қуана қабылдар едім. Фильмнің қандай жанрда болатыны маңызды емес, менің қолымнан келеді деп ойлаймын.
Журналистика факультетінде оқып жүрген кезімде мен грант ұтып алып, жарты жыл Будапештте, одан кейін жарты жыл Гонконгта, магистратурада білім алдым. Польшада тағылымдамадан өттім. Мен әлемді көру және түрлі елдерден тәжірибе алу үшін шетелдерге жиі шығуға тырысамын.
Бір жыл бұрын Алматыда тұрғанымда, маған «Еуразия» бірінші арнасынан «қоңырау шалып, қазақ тіліндегі ток-шоудың қосымша жүргізушісі болуға ұсыныс жасады. Мен қазақ тілінде сөйлеймін, бірақ ток-шоуды жүргізуге дейінгі деңгейде деп ойламаймын. Мен ұсыныстан бас тарттым, бірақ бірнеше айдан соң арнада ауа райын жүргізушінің бос жұмыс орнын ашты. Мен ұсынысқа қызығып, астанаға кастингке екі рет ұшып келдім (теледидар саласында оны «тракт» деп атайды), одан өтіп, ауа райының жүргізушісі болдым, тағы жарты жылдан кейін — «Қайырлы таң, Қазақстан!» бағдарламасының қосымша жүргізушісі атандым.
Көбісі ауа райының жүргізушісі болған оңай деп ойлайды. Іс жүзінде бұл олай емес. Университетте бізге теорияларды көп берді, бірақ өкінішке орай, тәжірибе болған жоқ. Тек телеарнада мен жарықпен қалай жұмыс істеу, камераның алдында қалай тұру керектігін, суфлерды оқуды үйрендім. Бұл режиссермен, түсірілім тобымен жасалатын көп сағаттық жұмыс.
«Бірінші арнадағы» таңғы бағдарлама — тікелей эфирдегі 60 минут. Өзімнің эфирлік аптамда мен 6:30 оянамын, және бұл мен үшін қиындық туғызбайды. Жұмысыңды жақсы көрген кезде сен эфирлік сағатыңды күтесің, өте қызықты кездесудің болатынын білесің. Күн сайын бізге жаңа қонақтар, медиалық тұлғалар, актерлер, спортшылар, әншілер, дәрігерлер, қала мен елдің дамуына үлес қосқан адамдар, стартаптарды ойлап тапқан адамдар келеді. Мен күн сайын олармен кездескеніме, тіпті 15 минутқа болсын, жаңа нәрселерді білгеніме бақыттымын.
Бізде қазақстандық актриса Айсұлу Әзімбаева (ол маған өте ұнайды), модель Алена Субботина, режиссер Тимур Бекмамбетов, ресейлік әнші Зара, «Иванушки International» тобы және көптеген басқа қонақтар болды. Олардың барлығы өте талантты, ерекше, қызықты. Ал бүгін (сұхбат жазылған күні - ред. ескерт). біздің таңғы эфирде тележүргізуші, продюсер Сангаджи Тарбаев болды, көбі оны «РУДН құрамасы» КТК командасының капитаны ретінде біледі. Ол мені MEGA Silk Way-дегі Chaplin кинотеатрына «Мен осындамын» атты қазақстандық детективтік триллердің тұсаукесеріне шақырды, фильмде ол өз-өзін ойнады.
Таңқаларлық, бірақ инстаграмдағы жұлдыздарға қараған кезде олар қолжетімсіз болып көрінеді. Міне олар сенің қарсы алдыңда, олармен сөйлескенде бір жайлылық сезімі пайда болады, энергетикасы беріледі, олармен әңгімелескен өте жайлы көрінеді. Сұрақтарды алдын-ала дайындап аласың, ал тікелей эфир кезінде әңгіме тіпті басқа арнаға бұрылып кетеді, себебі алдыңда өте қызықты сұхбаттас отыр — бұл керемет сезім! Мамандығымның арқасында менің өмірім жарқын, жаңалықтарға толы. Мен журналистика саласындағы мансабымды жалғастырамын, себебі бұл менің жақсы көретін ісім. Мен Қазақстанда немесе шетелде тұратынымды әзірше айта алмаймын. Мен әлемге саяхат жасағым келеді. Мен бір орында отырмайтын, бірқалыпты жұмысты атқармайтын адамдарды жақсы көремін.

MEGA туралы

Алматыда MEGA-ның алғашқы сауда-ойын-сауық орталығын ашқан кезде бұл орасан зор оқиға болды. Біз соның қасында тұрдық және ол жерге күнделікті мерекеге барғандай баратынбыз. MEGAzine журналы есімде, ол әрқашан жарқын, әдемі болатын. Біз інім екеуіміз бірден бірнеше данасын алып, мұқият оқып шығатынбыз, қандай фильмдердің болып жатқанын көріп, осы маусымда не киген дұрыс екенін қарайтынбыз, жұлдыздармен сұхбаттарды оқитынбыз.
Біз үшін MEGA — бұл туған үйіміз сияқты. Міне, Нұр-Сұлтанда да, егер маған сауда-ойын сауық орталығы қажет болса, мен бірден «Мегаға» барамын. Себебі бұл бала кезімнен қалыптасып қалған болар. Маған қоңырау шалып, сұхбат беруді және MEGAzine үшін фотосессия жасауды ұсынғанда, мен сенбей қалдым (күледі). Тіпті ініме ешнәрсе айтқан жоқпын, оны таңқалдырып, суретімді жібергім келеді.

Телеведущая Амината Айша Уэдраого: «Люблю людей, которые не сидят на месте»

Астана туралы

Менен көбісі «Алматыдан қалай көшіп келдің? Ұзақ ойланған шығарсың…» деп сұрайды. Жоқ, мүлдем олай емес, бәрі тез болды. Шамасы, мен өзгерісті қалаған болармын немесе бұл менің ісім екенімді түсінген шығармын. Екі күннің ішінде заттарымды жинап, жұмыстан шығып, барлығымен қоштасып, Астанаға ұшып кеттім.
Маған бұл қала, оның ерекше атмосферасы, өзім үшін жаңалық ашқан ұнайды. Өкінішке орай, мұнда достарым әзірше аз. Мен қуана-қуана бір жерге шығатын едім, бірақ ондай мүмкіндік сирек беріледі. Мен киноны, джазды, дәмді тамақтанғанды жақсы көремін, спортзалға барамын, белсенді демалысты ұнатамын. Қыста балалармен конькимен, балондарда сырғанаймын, осылай көңіл көтергенді жақсы көремін.
Мен барлық қала тұрғындарын Астана күнімен құттықтаймын! Мен осы қаланы жақсы көремін, ол жас, жарқын, өте әдемі. Егер сіз әлі мұнда болмасаңыз, міндетті түрде келіп, Елордамызды көріңіз. Оны сақтаңыз, сүйіңіз, ғаламшардың тұрғындары туралы көбірек білу үшін шетелде мақтап жүріңіз.